ប្រែសម្រួល៖ ស្រីស្រស់

លោក Scott Nolan អគ្គនាយកក្រុមហ៊ុនថ្មី General Matter និងជាអតីតវិស្វករនៃក្រុមហ៊ុន SpaceX មានបេសកកម្មជួយបញ្ចប់ការផ្តាច់មុខរបស់រុស្ស៊ីលើការផលិតឥន្ធនៈនុយក្លេអ៊ែរដែលមានការបង្កើនជាតិអ៊ុយរ៉ានីញ៉ូម ដោយផលិតវានៅកម្រិតពាណិជ្ជកម្មក្នុងសហរដ្ឋអាមេរិក និងកាត់បន្ថយថ្លៃដើម។

លោកបានបង្កើតក្រុមហ៊ុន General Matter ដែលមានមូលដ្ឋាននៅទីក្រុងសាន់ហ្វ្រាន់ស៊ីស្កូក្នុងឆ្នាំនេះ ដើម្បីផលិតអ៊ុយរ៉ានីញ៉ូមបង្កើនជាតិកម្រិតខ្ពស់និងបង្កើនជាតិកម្រិតទាប ហៅកាត់ថា HALEU សម្រាប់រោងចក្រនុយក្លេអ៊ែរប្រភេទផ្សេងៗ រួមទាំងអនុស្ថានីយនុយក្លេអ៊ែរទំហំតូច ដែលអ្នកគាំទ្រសង្ឃឹមថានឹងចាប់ផ្តើមដំណើរការនៅទសវត្សឆ្នាំ២០៣០។

HALEU គឺជាអ៊ុយរ៉ានីញ៉ូមដែលបានបង្កើនជាតិចន្លោះពី៥ទៅ២០ភាគរយ ដែលអ្នកគាំទ្រអះអាងថាមានសក្តានុពលធ្វើឱ្យអនុស្ថានីយថ្មីៗមានប្រសិទ្ធភាពខ្ពស់។ ឥន្ធនៈអ៊ុយរ៉ានីញ៉ូមដែលប្រើប្រាស់ក្នុងអនុស្ថានីយបច្ចុប្បន្នត្រូវបានបង្កើនជាតិត្រឹមប្រមាណ៥ភាគរយ។ ក្រុមហ៊ុនបច្ចេកវិទ្យាធំៗដូចជា Amazon មានគម្រោងសាងសង់អនុស្ថានីយថ្មីៗដើម្បីផ្គត់ផ្គង់មជ្ឈមណ្ឌលទិន្នន័យដែលត្រូវការថាមពលច្រើន។

លោក Nolan បានប្រាប់ Reuters ក្នុងបទសម្ភាសន៍ដំបូងរបស់លោកក្រោយពីបង្កើតក្រុមហ៊ុនថា៖ “យើងជឿជាក់ថា HALEU គឺជាតម្រូវការបន្ទាន់បំផុតក្នុងទីផ្សារសព្វថ្ងៃ និងងាយរងផលប៉ះពាល់បំផុតពីថ្លៃដើមនៃការបង្កើនជាតិ។”

គោលដៅរបស់ក្រុមហ៊ុន General Matter គឺកាត់បន្ថយថ្លៃដើមនៃការបង្កើនជាតិ HALEU ឱ្យនៅពាក់កណ្តាលក្នុងរយៈពេលវែង។ HALEU ត្រូវបានផលិតជាចម្បងនៅរុស្ស៊ី ហើយតម្លៃរបស់វាមិនច្បាស់លាស់។ ការប៉ាន់ស្មានមានចាប់ពី២៥,០០០ដៅ៣៥,០០០ដុល្លារក្នុងមួយគីឡូក្រាមនៃអ៊ុយរ៉ានីញ៉ូម។

ក្រសួងថាមពលសហរដ្ឋអាមេរិកបានផ្តល់កិច្ចសន្យាដំបូងដល់ក្រុមហ៊ុនចំនួនបួនរួមទាំង General Matter ដែលស្វែងរកការផលិត HALEU នៅសហរដ្ឋអាមេរិក ជាផ្នែកមួយនៃគំនិតផ្តួចផ្តើមដើម្បីជំរុញការផលិតក្នុងស្រុក។ សហរដ្ឋអាមេរិកមានគម្រោងផ្តល់កិច្ចសន្យាចំនួន២,៧ពាន់លានដុល្លារសម្រាប់ HALEU អាស្រ័យលើសភានាពេលខាងមុខ។

ក្រុមហ៊ុនដទៃទៀតដែលទទួលបានការគាំទ្រពីសហរដ្ឋអាមេរិករួមមាន៖ Urenco USA ជាក្រុមហ៊ុនអឺរ៉ុបដែលមានប្រតិបត្តិការនៅរដ្ឋញូវម៉ិកស៊ិកូ, Orano USA ដែលមានមូលដ្ឋាននៅរដ្ឋម៉ារីឡែន និងទីស្នាក់ការកណ្តាលនៅប្រទេសបារាំង និងក្រុមហ៊ុនបុត្រសម្ព័ន្ធ American Centrifuge Operating របស់ Centrus Energy។

អ្នករិះគន់ការប្រើប្រាស់ HALEU បាននិយាយថាកម្រិតនៃការបង្កើនជាតិរបស់វាមានហានិភ័យក្នុងការផលិតអាវុធ ហើយពួកគេណែនាំឱ្យកំណត់ការបង្កើនជាតិត្រឹម១០ទៅ១២ភាគរយ។ លោក Nolan បាននិយាយថាក្រុមហ៊ុនរបស់លោកនឹងពិគ្រោះជាមួយអាជ្ញាធរនិយ័តកម្មដើម្បីកំណត់កម្រិត។

លោក Nolan ធ្លាប់ធ្វើការនៅក្រុមហ៊ុនអវកាសឯកជន SpaceX របស់លោក Elon Musk ពីឆ្នាំ២០០៣ដល់២០០៧។ លោកបាននិយាយថាផែនការផលិត HALEU របស់ក្រុមហ៊ុនលោកនឹងចែករំលែកការផ្តោតរបស់ SpaceX លើការអភិវឌ្ឍបច្ចេកវិទ្យាថ្មី និងការកាត់បន្ថយថ្លៃដើម។

អ្នកនាំពាក្យក្រុមហ៊ុន General Matter បាននិយាយថា លោក Nolan មិនបានទាក់ទងជាមួយលោក Musk តាំងពី “មុនពេល” គំនិតបង្កើតក្រុមហ៊ុននេះត្រូវបានបង្កើតឡើងក្នុងឆ្នាំ២០២៣។

លោក Nolan មិនបានបង្ហាញថាក្រុមហ៊ុន General Matter នឹងប្រើប្រាស់បច្ចេកវិទ្យាប្រភេទណាដើម្បីផលិត HALEU នោះទេ។ ការផលិតអ៊ុយរ៉ានីញ៉ូមភាគច្រើនធ្វើឡើងដោយប្រើម៉ាស៊ីនបង្វិលដែលវិលក្នុងល្បឿនលឿន។ ក្រុមហ៊ុនថ្មីមួយចំនួនក៏កំពុងព្យាយាមប្រើកាំរស្មីឡាស៊ែរដើម្បីផលិតឥន្ធនៈអ៊ុយរ៉ានីញ៉ូមផងដែរ។

“បច្ចេកវិទ្យាខ្លះមានភាពជោគជ័យក្នុងពាណិជ្ជកម្មរួចហើយ។ ខ្លះទៀតនៅត្រូវបង្ហាញថាពួកគេអាចពង្រីកទំហំផលិតកម្មបានពីផ្នែកបច្ចេកវិទ្យា” នេះជាការលើកឡើងរបស់លោក Nolan៕

ប្រភព៖ Reuters